Şâd ol iy yañagı gül kâmeti şimşâd şâd

Şâd ol iy yañagı gül kâmeti şimşâd şâd

Dâd it halka ki virmez gerdiş-i bî-dâd dâd

Ömr bâgın bâde-i gül-reng-ile âbâd kıl

Kim gül-istânı kılıp-durur bihişt-âbâd bâd

İmin otur bâg içinde nâle-i kumrı işit

Mihnet-i devr-i kamerden itmegil feryâd yâd

Nev nev açıldı güller nukl döküp reng reng

Bâde nûş it bâda virme öri her-çi bâd bâd

Fitne olmış gözüñe nergis zihî sâhib-nazar

Bende olmış serv boyuña zihi âzâd zâd

İtmesün senden bizi bu dehr-i bed-girdar dûr

Kılmasun bizden seni bu çarh-ı bî-bünyâd yâd

Ahmedînüñ kanın içer dem-be-dem zâlim gözüñ

Zulmı elinden anuñ iy şâh-ı âdil dâd dâd