Şerî‘at sâhibi sultân tarîkat sâhibi merdân

Şerî‘at ṣâḥibi sulṭân ṭarîḳat ṣâḥibi merdân

Meded ḳıl yâ veliyya’llâh şefâ‘at yâ Resûlallâh

Ma‘rifet ṣâḥibi merdân ḥaḳîḳat ṣâḥibi sulṭân

Meded ḳıl yâ veliyya’llâh şefâ‘at yâ Resûlallâh

Bu nefsim ẓulmeti çoḳdan beni dûr eyledi Ḥaḳdan

Ḫalâṣ eyle bu duzaḳdan elim ṭut düşdüm ayaḳdan

İnâyet şerbetin Ḥaḳdan yetişdür baḥr-ı muṭlaḳdan

Meded ḳıl yâ veliyya’llâh şefâ‘at yâ Resûlallâh

Ḳurıdı gözlerimde yaş eridi cigerimde baş

Düridi bende çoḳ ḳulmaş yürüdi cismime ataş

Süridi yirlere yüz baş keremler eyle ey sırdaş

Meded ḳıl yâ veliyya’llâh şefâ‘at yâ Resûlallâh

Aḳup her yaña çaġlaram suçumı bildüm aġlaram

Cânım âh-ıla daġlaram ki ‘irfân-ıla yaġlaram

İşimi şimdi ṣaġlaram ümîdim Ḥaḳḳa baġlaram

Meded ḳıl yâ veliyya’llâh şefâ‘at yâ Resûlallâh

Elim boşdur yüzüm ḳara nice varam ben ol yâra

Zebûn olmuşam aġyâra anuñ-çün oldum âvâra

Meger sizden ola çâra oñıla bende bu yara

Meded ḳıl yâ veliyya’llâh şefâ‘at yâ Resûlallâh

Be-ḥaḳḳ-ı ḳalb-i ‘arşu’llâh be-ḥaḳḳ-ı ḳalb-i beytu’llâh

Be-ḥaḳḳ-ı ḳalb-i kenzu’llâh be-ḥaḳḳ-ı rûḥ-ı vaṣlu’llâh

Be-ḥaḳḳ-ı sırr-ı ehlu’llâh be-ḥaḳḳ-ı nûr-ı vechu’llâh

Meded ḳıl yâ veliyya’llâh şefâ‘at yâ Resûlallâh

Naẓar ḳıldı size Allâh naẓar ḳıluñ bize bi’llâh

Dinilsün dilde ẕikru’llâh bulunsun cânda vaṣlu’llâh

Olam bunda fenâ fi’llâh bulam anda beḳâ bi’llâh

Meded ḳıl yâ veliyya’llâh şefâ‘at yâ Resûlallâh

Bu derde eyleñüz dermân ki tâ müşkil ola âsân

Sizüñdür luṭf-ıla iḥsân sizüñdür devr iden devrân

Ża‘îf oldı ḳatı bu cân be-ḥaḳḳ-ı âyet-i Ḳur’ân

Meded ḳıl yâ veliyya’llâh şefâ‘at yâ Resûlallâh

Sinân Ümmî helâk oldı ki yoldan çıḳdı żâl oldı

Özi hem bî-mecâl oldı daḫı bî-perr ü bâl oldı

Ki ‘ömri pâyimâl oldı büküldi ḳaddı dâl oldı

Meded ḳıl yâ veliyya’llâh şefâ‘at yâ Resûlallâh