Şarâb-ı dil-güşâ olmaz o la’l-i cân-fezâdan yig

Şarâb-ı dil-güşâ olmaz o la’ l-i cân-fezâdan yig

Müferrih hab bulınmaz hâl-i rûy-ı dil-rübâdan yig

Musaffâ la’ li ol şûhuñ safâda Câm-ı Cemden hoş

Mücellâ sînesi âyîne-i ‘ âlem-nümâdan yig

Mahabbet lezzetin idrâk iden mihnetden incinmez

Gelür derdüñ dil-i bîmâr-ı ‘ uşşâka devâdan yig

Seni cândan seven bî-dillerüñ lutf eyle kadrin bil

Bulınmaz bende-i mukbil muhibb-i bî-riyâdan yig

Güşâyiş gerd-i râhuñdan yitişdi dîde-i câna

Safâ-yı hâk-i dergâhun cilâ-yı tûtiyâdan yig

Bülend-âvâze kıl sâz u nevâ-yı ‘ aşkı ey mutrib

Ki kalmaz kubbe-i gerduñda hergiz ol sadâdan yig

Umûruñ Hakka tevfîz it tevekkül eyle ey Bakî

Ki cây-ı ilticâ olmaz cenâb-ı Kibriyâdan yig