Çemende servi kad-i dil-sitâna beñzetdüm

Nihâli dil-ber-i nâzük-miyâna beñzetdüm

Nihâl-i bân ile her yanı şöyle zeyn olmış

Çemen vilâyetini şehr-i bâna beñzetdüm

Diyâr-ı Rûma gülistânın eyledüm teşbîh

Benefşezârını Hindûsitâna beñzetdüm

Gül ü şakâyıkuñ ol reng-i rûların gördüm

Hicâbı gâlib iki dil-sitâna beñzetdüm

Sabâ ile harekâtın görüp nihâllerüñ

Tevazu’ ehli birer nev-cevâna beñzetdüm

Tedârük eyle bu çaglar geçer gider kalmaz

Zamân-ı fursatı seyl-i revâna beñzetdüm

Cilâ-yı âyîne-i âb-ı cûyı seyr itdüm

Safâ-yı meşreb-i şâh-ı cihâna beñzetdüm

Güli çemende serîr-i zümürridîn üzre

Selîm Hân-ı sipihr-âsitâna beñzetdüm

Kolında şâhid-i bahtı görince ol şâhı

Şikâra pençe uran arslana beñzetdüm

Cemâl-i devleti gül gibi hurrem ü handân

Bisât-ı ‘ işretini gülsitâna beñzetdüm

Edâ-yı Bâkîyi vasfında Selsebîl sanup

Riyâz-ı bahtını bâg-ı cinâna benzetdüm

Son Yazılar