Çekmezse gam nola dil-i mestânemiz bizim

Yâd-ı lebinle meygededir hânemiz bizim

Biz mest-i feyzbahş-ı şarâb-ı muhabbetiz

Bestir cihâna cüra-i peymânemiz bizim

Biz neyleriz çerâğı şeb-i hecr-i yârda

Bin şem uyarır âh ile pervânemiz bizim

Biz tâirân-ı evc-i hevâ-yı hüviyyetiz

Genc-i şikenc-i turradadır lânemiz bizim

Rindân-ı âlemiz ki bize yâr olan gönül

Olur adû-yı sohbet-i bîgânemiz bizim

Vâiz düşerdi meygedeye kordu mescidi

Görse safâ-yı meclis-i rindânemiz bizim

Nefî gibi esîr-i cünûn-ı muhabbetiz

Uslanmasa nola dil-i divânemiz bizim

Hem nüktesenc-i nâdiregûy-ı zamâneyiz

Tutsa acep mi âlemi efsânemiz bizim

Son Yazılar