Çekemem derd-i firâkın meded ey mâh meded

Görmedim bunculayın bir gam-ı cângâh meded

Garazın cân ise ger gamzene fermân eyle

Eylesin nâz ile bir şîve-i dilhâh meded

Zabt-ı âh eylemedir âşıka evvel çâre

Ben ise âhsız ârâm edemem âh meded

Dâğlar lâle gibi tâzelenir miydi eğer

Âteş-i sîneme âh etmese her gâh meded

Çîn-i zülfünde giriftâr kalırdı dil-i zâr

Erişip bâd-ı sabâ etmese nâgâh meded

Hâl pek müşkül eğer etmez ise ey Nefî

Himmet-i Âsaf-ı sâhib dil-i âgâh meded

Hâfız-ı genc-i kerem hazret-i Ahmed Paşa

Ki eder ehl-i recâya geh ü bîgâh meded

Kaldım ayakda perîşân u mükedder ahvâl

Destgîr ol bana ey Âsaf-ı Cemgâh meded

Böyle dermândelerin derdine dermân et ki

Her işinde sana da eyleye Allâh meded

Nef'î

Son Yazılar