Âşıkıñ bir çâresi var zâr u giryândur yanar

Âşıḳıñ bir çâresi var zâr u giryândur yanar

Yâr elinden yarası var yüregi ḳandur yanar

Ṭudaġı çat çat yarılup ṣararup beñizleri

Ṭaşı fânî cânı bâḳî dôsta mihmândur yanar

Mâsivâ sevdâsına baş egmeyen merdâneler

Dôstı derdiyle hemîşe kâmil insândur yanar

Ṭâlibiñ yoḳdur ḳarârı zâhidiñ ferdâsına

Vuṣlat-ı dîẕâra ḳarşu cânı ḳurbândur yanar

Gelmesün diñ zâhide ‘aşḳ ehliniñ yaġmasına

Döymez ‘aḳlı ehl-i derdiñ devr-i külḫândur yanar

N’ola anuñ yolına cümle ‘âlem olsa fedâ

Muṣṭafânıñ ‘aşḳına çün baş ile cândur yanar

Yanmaġa yoḳdur liyâḳat sende çün-kim urma lâf

Göricek pervâne şem‘i âyin erkândur yanar

Âr u nâmus döymez anuñ ẕâtınıñ envârına

Çün başa sevdâsı geldi adıla ṣandur yanar

Aşḳ odınıñ vaṣfını bizden ṣoran alsın ḫaber

Ḳılsa germiyyet kemâli iki cihândur yanar

Âşıḳıñ cânı anuñ pervânesidür bî-gümân

Yanduġınca yanmaḳ ister ṣad hezârândur yanar

Dil ne söylerdi Ḫudânıñ nuṭḳı olmasa ‘aceb

Aşḳ odınıñ gör kemâlin adı ‘irfândur yanar

Bülbül irincek gülüñ envârına ṭurmaz dili

Dâ’imâ gülzâra ḳarşu zâr u efġândur yanar

Yâre ḳarşu yandı baġrı derd-ile ḳaynar ciger

Ṭaşına baḳan ne bilsün Ümmî Sinândur yanar