Âşıkam vechiñ görüp hayrân olam her dem senüñ

Âşıḳam vechiñ görüp ḥayrân olam her dem senüñ

Ṣâdıḳam ẕâtıñ görüp ḳurbân olam her dem senüñ

Ẓulmet-i keṯretde her dem âh ider pervâneyem

Ol cemâliñ şem’ine biryân olam her dem senüñ

Göñlümüñ ṭûrında Mûsâ gibi ednâdur bu cân

Hem tecellî nûrına giryân olam her dem senüñ

Bülbülem âh u fiġânımdan murâdım her nefes

Bâġ-ı gülzârıñda ḫôş ḫandân olam her dem senüñ

Ṣu gibi çaġladuġumdan her zamân leyl ü nehâr

Baḥr-ı ẕâtıña irüp ‘ummân olam her dem senüñ

Ṣun maḥabbet bâdesinden sâḳıyâ bir câm bugün

Nûş idüben ‘aşḳıña mihmân olam her dem senüñ

Cânı vuṣlat şerbetinden ayıḳ itme ḳıl kerem

Vaḥdetiñ envârına ḥayrân olam her dem senüñ

Urvetü’l-vüṯḳâ daḳup gerdânuma geldüm ezel

Yolıña cân virmege merdân olam her dem senüñ

Genc-i kimyâ bâbını fetḥ eyle dilde ey Kerîm

Derdlü ‘âşıḳlarıña dermân olan her dem senüñ

Eyle maḥv eyle hüviyyet baḥrına sür ḳalbimi

İlmiñe ‘irfânıña burhân olam her dem senüñ

Ġuṣṣa vü ġamdan ḫalâṣ eyle dir uş Ümmî Sinân

Fażlıñ-ıla tâ ebed sulṭân olam her dem senüñ