Âşık nâmından usandum gerek âvâre kılsunlar

Âşıḳ nâmından uṣandum gerek âvâre ḳılsunlar

Bugün vaṣlıña el ṣundum gerek pür yâre ḳılsunlar

Niçe bir ḥasret-i hicrân daḳar dâr zülfüñe gerdân

Beni lâyıḳ gerek nûra gerekdür nâre ḳılsunlar

Ḳarârım gitdi selb oldı niçe bir eyleyem ġayret

Yirim sensüz gerek ḫâre gerek gülzâre ḳılsunlar

Niçe bir hasretiñ nârı beni iḥrâḳ ider her dem

Bugün vaṣlıñdan ayrılman gerek biñ pâre ḳılsunlar

Ḫayâliñ cânıma ḳıble gelüp ‘aşḳıñ îmâm oldı

Niyâzın il gerek yâre gerek aġyâre ḳılsunlar

Bugün meydân-ı ‘aşḳıñda şehîd olmaḳ murâdımdur

Buyur cellâd gerek maḫfî gerek âşkâre ḳılsunlar

Gel olursa eger senden geçer varlıḳ hevâsından

Sinân Ümmî ḳarâr ḳılmaz gerek biñ pâre ḳılsunlar