Ârifiñ kalbinde her dem ‘alleme’l-esmâsı var

‘Ârifiñ ḳalbinde her dem ‘alleme’l-esmâsı var

Âşıḳıñ ḳalbinde her dem ma‘şûḳuñ sevdâsı var

Sırrına ḥâlen tecellî eylemiş ol pâdişâh

Ehl-i vaḥdet ehl-i vuṣlat ẕevḳınıñ ra‘nâsı var

Kâmil insân on sekiz biñ ‘âlemi câmi‘-durur

Âlemiñ ḳalbinde her dem âyet-i kübrâsı var

Gerçek erler Ḥaḳ yolında varlıġın eyler fenâ

Sâlikiñ ḳalbinde Ḥaḳdan ġayrınıñ ifnâsı var

Âr ider ‘âriflere baş egüben ḥaḳ görmege

Daḫl ider daḫḫâlı gör nâ-ḥaḳ yire da‘vâsı var

Dersini İblîsden alup küfrini îmân ṣanur

Münkiriñ ḳalbinde naḳş olmış ḳurı ġavġâsı var

Küfr ü îmân neydügin fehm eylemez yoḳdur necât

Fâsıḳıñ ḳalbinde her dem İblîsiñ iġvâsı var

Vâḥid ü Ferd ü Aḥaddur dâ’imâ ẕikr itdügi

Ẕâkiriñ ḳalbinde her dem tevḥîdiñ deryâsı var

Ḥamdü li’llâh çoḳ şükür iḥsânına yoḳdur ‘aded

Şâkiriñ ḳalbinde her dem şükr ider Mevlâsı var

Ḥikmeti vü ḳudreti çoḳ Ḫâliḳ-ı Yezdânımıñ

Münkiriñ ḳalbinde lâsı mü’miniñ illâsı var

Âşinâsından ḫaberdâr olmayup ġuṣṣa çeker

Zâhidiñ ḳalbinde her dem cennetiñ ferdâsı var

Gün gibi âşkâredür ‘âşıḳlara tevḥîd-i ẕât

Ḳulle-i Ḳâf üzre ṭurmış âdemiñ ‘Anḳâsı var

Mü’miniñ mir’âtı mü’mindür beli ḥaḳḳa’l-yaḳîn

Ol Muḥammed Muṣṭafânıñ nûrınıñ ebhâsı var

Dir Sinân Ümmî bizüm maḳṣûdumuz Hûdur hemân

Anuñ-içün ġayrısından ḳalbiñ istiġnâsı var