Ârifin mutlak kelâmın duymağa irfân gerek

Ârifin mutlak kelâmın duymağa irfân gerek

Sırr-ı muğlakdır gönülde zevk ile vicdân gerek

Bir hazînedir tasavvuf mâlik olmaz her hasîs

Bulmağa anı dü âlemde beğim sultân gerek

Dürr-i yektâ kânını âlemde bulmak isteyen

Bulmaz anı nehr içinde bahr-i bî-pâyân gerek

Ma'rifet da'vâsın eden müdde'i bilmez mi kim

Dildeki da'vâya elde hüccet ü burhân gerek

Ârif oldur halkı başına üşürmek istemez

Gönlü cümle halk içinde hâk ile yeksân gerek

Kibr ü ucbun illetinden kurtulup sağ olmağa

Bil tabîbin ma'nada şeyhin senin Lokmân gerek

Şöhret ıssı ma'rifet gencini bulmakdır muhâl

Zîra anın varlığı başdan başa vîrân gerek

Ölmeden evvel ölüp kabre girip haşre çıkıp

Mâlikü'l-mülkün şuhûdunda gönül hayrân gerek

Nefs tamusın sırât-ı şer ile bunda geçip

Kalb evi hûr u gılmân ravza-i rıdvân gerek

Söyleyip işitdiği dahi görüp fikr etdiği

İstivâ-yı arş-ı sırda Hazret-i Rahmân gerek

Her kaçan tûtilere feth-i dehân etdikde ol

Lezzetinden tûtiler sözlerine nedmân gerek

Geh hâmûs olup dilinden kimse almaya cevâb

Geh açılıp şâd olup güller gibi handân gerek

G3ahi üns ü gâhi heybet gâhi rû'yet geh cemâl

Gâhi sahv u gâhi mahv u geh vücûd geh cân gerek

Terk edip cümle kuyûdâtı erişe sırfa ol

Sırfa erse bir gönül içi anın ummân gerek

Çünki ârîdir izâfâtdan vücûdu dilberin

Zevk-i külli isteyen âşık dahi üryân gerek

Mısriyâ terk-i izâfât etmeğe lâyık olan

Kümmel-i insân içinde binde bir insân gerek