Ârif-iseñ vir haber kim ma‘nî-i mutlak nedür

Ârif-iseñ vir ḫaber kim ma‘nî-i muṭlaḳ nedür

Nâtıḳ-ısañ işbu yolda söyle kim el-ḥaḳ nedür

Ṣorduġum ‘ayb olmasun ‘âr itmez aṣlın ṣoylayan

Âşıḳıñ ‘azm itdigi menzil-i istiġrâḳ nedür

Men ‘aref sırrın bilen virsin bize bir ḫûb kelâm

Lâ-yıla illâdan olan muḫtelif aḫlâḳ nedür

Kenz-i maḫfî sırrınıñ esrârını söyler dilim

Ehl-i ‘aşḳa lâ diyüp İblîs oḳın atmaḳ nedür

Feẕküru’llâhe ḳıyâmen ḫôş ṣırâṭa’l-müsteḳîm

Berzaḫ ili perdesin bu ẕikr-ile açmaḳ nedür

Bil ki fetvânıñ nedür taḳvâsı añlañ ‘ayân

Ġayr-ı Ḥaḳḳa devr idüp Hûdan dönüp ḳaçmaḳ nedür

Dört kitâbıñ ma‘nisi yek noḳtadan oldı ‘ayân

Ṭâlibe ḥadd ü ḥicâb olan ḳara vü aḳ nedür

Nefsini fehm eyleyendür ‘ârif-i bi’llâh olan

Ârifiñ ḳalbini envâr eyleyen işrâḳ nedür

Arş ü kürsî cem‘ idüp vâḥid ḳılan kimdür bugün

Küntü kenziñ ma‘nisinden oḳınan evrâḳ nedür

Pîr yüzinden bildüñise âb-ı ḥayvân neydügin

Feyż-i Aḥmedden gelen âb-ı revân ırmaḳ nedür

Münkir-i rü’yâ degülseñ yek naẓar ḳıl sen saña

Cân göziniñ gözlüginden görünen gel baḳ nedür

Ẕâtına maẓhar olan insândan olmış bî-ḫaber

Zâhidiñ meyl eyledügi ḥûrî vü uçmaḳ nedür

Lâ kelâmından geçen añlar bu ẕikriñ ma‘nisin

Dir Sinân Ümmî anuñ envârına müştâḳ nedür