Zâhidâ gel ‘aşka yâr ol maksûduñ mesrûr ise

Zâhidâ gel ‘aşḳa yâr ol maḳṣûduñ mesrûr ise

Aşḳ elinden tevbekâr ol menziliñ maḳṣûr ise

Aşḳa hem-râh olmayanlar bulmayısardur ḫalâṣ

Len terânî perdesinden Mûsî’i gör ṭûr ise

Zâhidâ ‘aḳlıñ senüñ bu sırrı âgâh eylemez

Kâfire ṭa‘n eyleme ger ‘aşḳ-ıla ma‘mûr ise

Zîrâ ‘aşḳa küfr ü îmân ḥâ’il olmaz şöyle bil

Cümle ‘âlem ger ḥicâb-ı nûrı ger tennûr ise

Gûş iderseñ vaṣfını diñle deñizden ḳaṭrece

Müstemi‘ ol bir nefes gel söyleyem ma‘ẕûr ise

Gerçi ‘aşḳı vaṣf iderse niçe biñ yıllar tamâm

Şerḥ olunmaz, cümle ‘âlem kâtibi mesṭûr ise

Aşḳ degül mi nûr-ı câmi‘ var iden bil ibtidâ

Gerçi Ḥaḳḳıñ künh-i ẕâtı lâ-te‘ayyün nûr ise

Aşḳ degül mi nûr-ı câmi‘den ḳılan ‘arşı binâ

Gerçi Ḫâliḳ ḳudretinden ṣâni‘ mestûr ise

Aşḳ degül mi nûr-ı ‘arşı eyleyen kürsî semâ’

Gerçi kim şems ü ḳamer cümle nücûm pür-nûr ise

Aşḳ degül mi berr ü baḥri ẓâhir iden ne ki var

Ba‘żı maḳbûl ba‘żı gerçi yâbis ü maḥcûr ise

Aşḳ degül mi on sekiz biñ ‘âlemiñ sermâyesi

Gerçi yerler gökler ehli ḥikmete manẓûr ise

Aşḳ degül mi kim sekiz cennâtı zeyn iden tamâm

Gerçi Ḥaḳḳıñ ḳullarına raḥmeti mekṯûr ise

Aşḳ degül mi yedi ṭamu nârın iden pür-‘aẕâb

Yaḳısar Ḥaḳḳa Nebîye ‘aşḳa kim menkûr ise

Aşḳ degül mi kenz-i maḫfî’i ‘ayân iden ezel

Ger Muḥammed maẓhar-ı ẕâtı muṣavver nûr ise

Aşḳ degül mi ḥurmetine ẓâhir iden Aḥmediñ

Enbiyâ’ ü mürselîniñ cümlesi pür-nûr ise

Aşḳ degül mi enbiyâ’ ü mürselîniñ ḥurmeti

Ger nebîdür ger velîdür her ne kim meşhûr ise

Aşḳ degül mi aṣl-ı ebrâr u muḳarreb ġayrı nâs

Külli şey’ hep ṭâḳatınca Ḫâliḳa meşkûr ise

Aşḳ degül mi Âdemi bir niçe yüz yıl aġladan

Muṣṭafânıñ ḥurmetine ger suçı maġfûr ise

Aşḳ degül mi Şîte bunca dürlü ṣan‘at ögreden

Gerçi Cebrâ’îl vesîle iẕn-i Ḥaḳ destûr ise

Aşḳ degül mi Eyyûbı derde giriftâr eyleyen

Gerçi ẕikri dem-be-dem hem messeniye’ż-żurr ise

Aşḳ degül mi Ya‘ḳûbuñ gözlerini ḳan eyleyen

Gerçi Yûsuf ḥasretinden cigeri tennûr ise

Aşḳ degül mi Yûsufı Ken‘âna sulṭân eyleyen

Gerçi taḳdîr-i Ḫudâ-yı Ḳâdir u Ġayûr ise

Aşḳ degül mi kim ḳılan anuñ ‘aṣâsın ejdehâ

Gerçi kim Mûsâ bin ‘İmrân-ı Kelîm-i ṭûr ise

Aşḳ degül mi meyyiti ‘Îsâ deminden ḥay ḳılan

Gerçi kim maẓḥar-ı ḳudret ma‘den-i meşhûr ise

Aşḳ degül mi evvel âḫır Muṣṭafânıñ devleti

Gerçi anuñ ḥurmetine külli şey mefḫûr ise

Aşḳ degül mi ḥaḳ ḳılan şer‘i ṣırâṭ-ı müsteḳîm

Gerçi kim vech-i Muḥammedden beri maẓhûr ise

Aşḳ degül mi Muṣṭafâyı yâre vuṣlat bulduran

Gerçi peyk-ile Ḫudâsı vaḥdete oḳur ise

Aşḳ degül mi Muṣṭafâyı ḳâbe ḳavseyn eyleyen

Gerçi ev ednâ şarâbından sırı maḫmûr ise

Aşḳ degül mi Murtażâyı şîr-i Yezdân eyleyen

Gerçi kim evvel Resûle vâḥidün min nûr ise

Aşḳ degül mi yir yüzine nâzil iden dört kitâb

Biri Tevrât İncîl ü Furḳân ü ger Zebûr ise

Aşḳ degül mi her Nebîden gösteren bir mu‘cizât

Gerçi Ḫâliḳ ḫılḳatında ḳâbiliyyet ḳor ise

Aşḳ degül mi ṭâlibi bir mürşide ḳul eyleyen

Bâb-ı Ḥaḳdan gerçi ḫâk-i pâyine yüz sürise

Aşḳ degül mi Leylîye Mecnûnı mecnûn eyleyen

Gerçi kim anuñ ḫayâlinden yol üzre ṭur ise

Aşḳ degül mi cân-verler görüben ‘Abdürezzâḳ

Gerçi yâriñ yarasınden zâr-ı bî-ḥużûr ise

Aşḳ degül mi Ferhâdıñ zâr-ıla ṭaġlar deldügi

Ger Şirîniñ ḥasretinden âh idüp darb urısa

Aşḳ degül mi kim Züleyḫânıñ özin nâr eyleyen

Gerçi Ya‘ḳûb oġlı Yûsuf arada mezbûr ise

Aşḳ degül mi ‘âşıḳı şevḳ-ıla ber-dâr eyleyen

Gerçi Baġdâdî ene’l-ḥaḳ söyleyen Manṣûr ise

Aşḳ degül mi ancalaruñ ẓâhirin vîrân iden

Gerçi kim bâṭın binâsı ‘aşḳ-ıla ma‘mûr ise

Aşḳ degül mi ‘âşıḳı hem sırr-ıla sulṭân iden

Gerçi ḫalḳ-ı ‘âlem içre ‘âciz ü maḳhûr ise

Aşḳ degül mi bu Sinân Ümmîyi bülbül eyleyen

Gerçi ẕikr-i ḫâṣ-ıla ol Ḫâliḳa meẕkûr ise

Aşḳa her kim ṭa‘n iderse evvel âḫır ḥurmeti

Yoḳdur anuñ gerçi ‘ilmi nâm-ıla maġrûr ise