Zâhid benüm ‘aşka yâr olduġum mıdur hatâ

Zâhid benüm ‘aşḳa yâr olduġum mıdur ḫaṭâ

Aşḳ-ıla yoḳluġı kâr ḳılduġum mıdur ḫaṭâ

Çün buyurdı ol Resûl mûtû ḳable en-temût

Ölmezden öñ ‘aşḳ-ıla öldügüm midür ḫaṭâ

Ben bu mülke gelmeden çâr ‘anaṣır olmadan

Aṣlımdaġı ‘ummâna ṭalduġum mıdur ḫaṭâ

Geçüp aḳdan ḳaradan istedigüm Yaradan

Mâsivâyı aradan sildügüm midür ḫaṭâ

Dilimdeki ẕikrimiñ ḳalbimdeki fikrimiñ

Ma‘nîsini özümde bulduġum mıdur ḫaṭâ

Gördüm vücûd ilinde Ḳur’ân oḳur dilinde

Ṭıfl-i ma‘nî dersini bildügüm midür ḫaṭâ

Şıluban derd-ile âh dilimdeki ol İlâh

Salṭanat taḫtında şâh olduġum mıdur ḫaṭâ

Bir kişiniñ yüzinden biñ kişiye luṭf olur

Ancak göñül pâsını sildügüm midür ḫaṭâ

Ümmî Sinân dir ḫvâce fikrim bu irte gice

Aşḳ-ıla cân mi‘râca ṣalduġum mıdur ḫaṭâ