Zikrimiz esrâr-ı Hakdur cânımız hayrân-ı Hû

Ẕikrimiz esrâr-ı Ḥaḳdur cânımız ḥayrân-ı Hû

Fikrimiz bâzâr-ı Ḥaḳdur baġrımız biryân-ı Hû

Ḳalbimi iḥyâ iden ol Pâdişâh-ı Lâ-yezâl

Göñlümüz mi‘mâr-ı Ḥaḳdur ḳaṭremiz ‘ummân-ı Hû

Dersi Ḥaḳdan görmeyen bilmez bizüm güftarımız

Dersimiz envâr-ı Ḥaḳdur sırrımız seyrân-ı Hû

Tevḥîd-i ẕât-ı İlâhîniñ kemâlin söylerüz

Sözimiz aḫbâr-ı Ḥaḳdur özümüz mihmân-ı Hû

Dünye vü ‘uḳbâ hevâsın terk iden gelsün beri

Azmimiz dildâr-ı Ḥaḳdur derdimiz dermân-ı Hû

Dört kitâbıñ ma‘nisin keşf eyledük ḥaḳḳa’l-yaḳîn

Ṣun‘umuz ol kâr-ı Ḥaḳdur keşfimiz ol ḫân-ı Hû

Evliyânıñ enbiyânıñ menzilinden al ḫaber

Cânımız ber-dâr-ı Ḥaḳdur olmışuz mestân-ı Hû

Faḳr içinde faḫra irdük ġayrı gitdi aradan

Seyrimiz dîẕâr-ı Ḥaḳdur vaṣlımız vicdân-ı Hû

İḫtiyâr elden gidicek neylesün Ümmî Sinân

Varımız ol var-ı Ḥaḳdur nuṭḳumuz ‘irfân-ı Hû