Yire göge ‘arşa kürse sıġmayan Sultân menem

Yire göge ‘arşa kürse ṣıġmayan Sulṭân menem

Cümle ‘âlemden münezzeh ẕâtı ol Sübḥâñ menem

Ṣan‘atımıñ ẕerresinden cümle ‘âlem oldı var

Ḥikmet-ile külli şey’i var iden ol Ḫân menem

Her kime sevsem sevilsem derde ḳıldım mübtelâ

Enbiyâlar evliyâlar sırrına mihmân menem

Künh-i ẕâtım varlıġından kimseler virmez nişân

Baḥr-ı muṭlaḳ lâ-te‘ayyün ḥaddi yoḳ ‘ummân menem

Pâdişâh-ı lâ-yezâlem kimse bilmez sırrımı

Çarḫ urup ‘âlemlere devr itdüren devrân menem

Muştuladum ben size ẕâtım ṣıfâtım vaṣfını

Ḳul hüvallâhü eḥaddur oḳunan Ḳur’ân menem

Ẕâtım Allâhü eḥaddur vaṣfım Allâhü’ṣ-ṣamed

Cins ü miṯlim yoḳdur öñ ṣoñ yalıñuz Deyyân menem

Gizli degül gün gibi âşkâreyem ‘âriflere

Münkiriñ göñlin perîşân eyleyen pinhân menem

Âṣîler ‘iṣyân idüp ben dem-be-dem iḥsân idüp

Raḥm idüp ḳullarımı ‘afv eyleyen Ġufrân menem

Ey Sinân Ümmî benüm cevr ü cefâmdan ġam yime

Aç gözüñ ḳaldur ḥicâbı derdlere dermân menem