Vuslat hevesin ko gam-ı hicrân ne belâdır

Vuslat hevesin ko gam-ı hicrân ne belâdır

Var tâlib-i derd ol yürü dermân ne belâdır

Dâim dolaşıp gezme ser-i kûyunu yârın

Bilmez misin ol âfet-i devrân ne belâdır

Âh etmemeğe çâre mi var âşık-ı bîtâb

Habs-i nefes ü çâk-ı girîbân ne belâdır

Cemiyyet-i hâtır mı kalır âşık olunca

İllâ gam-ı gîsû-yı perîşân ne belâdır

Dünyâyı girişmeyle esir eyledi bilmem

Câdû mudur ol gamze-i fettân ne belâdır

Göz habsine saldı dili mestâne nigehle

Bir kûşede meyhâne vü zindân ne belâdır

Biz rind-i sebük rûh-ı cihânız bize hemdem

Rind olmayıcak sıklet-i yârân ne belâdır

Var hâk-i reh-i ehl-i dil ol kaçma sitemden

Erbâb-ı dile gayret-i akrân ne belâdır

Nefî sözünü vird-i zebân eyledi âlem

Şimdiden geri yâ defter ü dîvân ne belâdır

Nef'î