Vaslıñ revâ kıl ey Hudâ ol küntü kenzu’llâh içün

Vaṣlıñ revâ ḳıl ey Ḫudâ ol küntü kenzu’llâh içün

Cân yoluña olsun fedâ şol ‘ayn-ı ẕâtu’llâh içün

Evvel ḳamudan adını öñden ḳoduñ bünyâdını

İzzetine ‘izzet idüp sevdüñ Ḥabîbullâh içün

Senden ‘aṭâ bizden ḫaṭâ böyle ḳuruldı ibtidâ

Afv it bizüm ḫaṭâmızı Âdem ṣafiyyullâh içün

İṣyân deñizinden bizi ḳurtar anuñ ḥurmetine

Evvel aña ḳılduñ necât Nûḥ-ı Neciyyullâh içün

Deryâyı varlıḳdan ḫalâṣ eyle anuñ ‘aşḳına kim

Baṭn-ı balıḳda ẕikr iden Yûnus Resûlullâh içün

Ḥıżr içdügi âb-ı ḥayât ‘âşıḳlara ḥâcet degül

Vaṣlıñ meyinden ṣun bize Ḥıżr-ı Nebiyyullâh içün

Firḳat nârı-y-la cânların göyündürme ey Pâdişâh

Göster ẕâtıñ gülzârını dostuñ Ḫalîlullâh içün

Ḥüsn-i cemâliñden cüdâ olanlardan ḳılma bizi

Ṣalma ebed ḥüzn itmege Ya‘ḳûb ḥüznullâh içün

Ḥüsn-i cihânıñ kimseye ḳalmaz beḳâ bellü beyân

Ḥüsn-i beḳâdan ḳıl naṣîb Yûsuf ḥüsnullâh içün

Tecellî ẕâtıñ pertevi varlıḳ ṭaġın ḳılsun fenâ

Aç len terânî perdesin Mûsâ Kelîmullâh içün

Gerçi mücerred pâk idi ḳaldı semâ’-ı ṯânîde

Cümle ḥicâbı sen geçür ‘¡sâ-yı Rûḥullâh içün

Ḥurmetine ḥurm et bizi ḳurbetine ḳurb et bize

Künh-i ẕâta maḥrem olan Aḥmed Resûlullâh içün

İşler Sinân Ümmî ḫaṭâ niçün ḫaṭâya yüz ṭuta

Gelsün diyü Ḥaḳdan ‘aṭâ ol feyż-ı fażlu’llâh içün