Vasf-ı nihânımdan soran alsın haber nerde idüm

Vaṣf-ı nihânımdan ṣoran alsın ḫaber nerde idüm

Var olmadan kevn ü mekân ol Şâhıla birde idüm

Aḳl-ıla ‘azm iden buña iremeye ḳala ṭaña

Nûr-ı ḥaḳâyıḳ ḳılmadın ‘ilmu’llâhda sırda idüm

Baḥr-ı ẕâtıñ mevci beni sürdi kenâra ‘aşḳ-ıla

Ẕât-ı ḥaḳâyıḳ nûrına geldüm ‘aceb yerde idüm

Evvel anuñ ẕâtı nûrı ‘aşḳ-ı ezelî nâr-ıla

Yedi ismiñ nûrın mâye ḳıldıġı esrârda idüm

Ef‘âlimiñ esrârıdur söyledigim añlayana

Yedi biñ yıl ḫalvet süren ḳandildeki nûrda idüm

Nâr-ı maḥabbet ḳaynadı envâr-ı mevc oldı revân

Ol ḳandiliñ ṭış yüzine ¥arbı inen derde idüm

Geldüm cihâna çün Âdem cennete gönderdi Ḫudâm

Emrin ṣıdum redd eyledüm Serendibde zârda idüm

Gâhi Nûḥ oldum gâhi Lûṭ gâh Yûnus oldum gâh Dâvûd

İbrâhîm-ile bir zamân âteşde gülzârda idüm

Bulsa kişi dôstdan belâ ma‘şûḳ gelüp vefâ ḳıla

Ḳurtlar tenüm çiyneriken Eyyûb-ıla zârda idüm

Ya‘ḳûb-ıla ḳıldum fiġân Yûsuf-ıla oldum revân

Şehr-i Mıṣırda bey‘ olan dellâl-ı bâzârda idüm

Her bir nebî geldi bile mihmân idüm ben sırrıla

Îsâ ile aġdum göge Mûsâ ile ṭûrda idüm

Geldi cihâna Muṣṭafâ mi‘râc idüp buldı ṣafâ

Bende bile gördüm vefâ ḥażretde naẓarda idüm

Ben yârıma cân virmege na‘ra urup Ḥallâc-ıla

Çaldum ene’l-Haḳ nevbetin Manṣûr ile dârda idüm

Vuṣlat şarâbından içüp ḥayrân olan gelsün berü

Ṭoldurdum ‘aşḳıñ câmını geldüm ol baḥrda idüm

Ben degülem bunı diyen ilhâm-ı Ḥaḳdur söyleden

Bir sır gelüp nuṭḳ eyledi ben arada perde idüm

Ümmî Sinân eydür bu cân ḳılmaz nişânda bir mekân

Zîrâ ki ol şâhıma ben varmaġa iḳrârda idüm