Tarab ne gûne olur tâliʿ ü sitâre göre

Sunarsa câm-ı lebin çekdiğim humâra göre

Kanı sabâ gibi bir dil-nevâz kim gâhî

Dil-i nizârımı kûy-ı nigâra vara göre

Seherden eyledi yağmâ şemîm-i gîsûsun

Nesîm bir dahı uğrar mı bu diyâra göre

Hased o rinde ki hâb-ı ademden açsa gözün

Kabâ-yı sabrı çü nergis hezâr-pâre göre

Başında hurd edeyim şöyle kim asâsını şeyh

Elinde mutrıb-ı bezmin çihâr-pâre göre

Görün bu derdi ki tıryâk-ı erbaʿayla tabîb

Diler ki zahm-ı çihâr-ebruvâna çâre göre

Seninle terk-i riyâ denli güçdür ey vâʿiz

Şarâba tevbe Nedîm-i günâhkâra göre

Son Yazılar