Tagıdup her yaña zülfın ‘anber-efşân itmede

Tagıdup her yaña zülfın ‘ anber-efşân itmede

Âh kim bî-dillerin hâtır-perîşân itmede

Turralar boynın burup hüsnin temâşâlanmada

Zülfi tâvûsı İrem bâgında cevlân itmede

Kendü güller gibi handân lîk çeşm-i ‘ âşıkı

Dem-be-dem ebr-i bahârî gibi giryân itmede

Deşt-i gamda her yaña tenler getürdi seyl-i hûn

Turmayup Tâtâr-ı gamzeñ tîr-bârân itmede

Bakmaz ol sultân-ı Mısr-ı hüsn hergiz hâlüme

Nîlveş cûy-ı sirişküm turma tugyân itmede

Göñlümüz ma’ mûresin ol husrev-i bî-dâdger

Mülk-i Îrân sandı beñzer turma vîrân itmede

Derd-i ‘ aşk artar ilâç itdükçe Bâkî şöyle bil

Âciz olmışdur etibbâ aña dermân itmede