Ta‘âlâ şânühû Rabbi ey Hudâ

Ta‘âlâ şânühû Rabbi ey Ḫudâ

Tecellâ ẕâtühû ḥaḳḳı fi’l-bedâ

Ey ṣıfâtıñ ḳul hüva’llâhü aḥad

Anuñ-içün yoluña cânlar fedâ

Ẕât-ı pâkiñdür çün Allâhü’ṣ-ṣamed

Kim saña lâzım degül hergiz ġıdâ

Cins-i miṯliñ hem naẓîriñ yoḳ senüñ

Vâḥid ü ferd ü aḥad kân-ı ‘aṭâ

Fâ‘il-i muṭlaḳsın ey Allâh ki sen

Kimse yıġmaz ḥükmüñi hiç orṭada

Her neye olsa irişür ḳudretiñ

Emriñe maḥkûm-durur bây u gedâ

Yoḳ-durur bir şey ki ‘ilmiñ irmeye

Cümle ‘âlemde vü yaşda ḳurıda

Ẕerresinden cümle ‘âlem ṣun‘uñuñ

Oldı peydâ gönderüp ḳılduñ nidâ

Yâ İlâhî eyle tevfîḳıñ refîḳ

Olmayalum ḥażretiñden biz cüdâ

Ey Kerîm ü ey Raḥîm ü ey Ġafûr

Biz günâhlı ḳullara sen ḳıl hüdâ

Sen beḳâsın sen beḳâsın yâ Ġanî

Biz fenâyuz biz faḳîrüz biz gedâ

Sen ḳavîsin ey Ḥakîm-i lâ-yemût

Biz ża‘îfüz fażlıñ içün ârzûda

Bu Sinân Ümmîye luṭfuñ ḳıl naṣîb

Kim yañılmayup saña doġrı gide