Ta‘âla’llâh yâ Hannân ki zâtıña zevâl olmaz

Ta‘âla’llâh yâ Hannân ki ẕâtıña zevâl olmaz

Yüce Sultân yâ Mennân nüzûle intikâl olmaz

Zehî Sulṭân-ı a‘lâsın ‘inâyet issi Mevlâsın

Hem evlâlardan evlâsın ki künhüñe hayâl olmaz

Zehî evvelsin ey Hâdî viresin cümle murâdı

Senüñdür kaygu vü şâdî aña bir gayri hâl olmaz

Ki sensin Vâhid ü Kahhâr bizi eyle saña sen yâr

Ne öñüñ var ne ṣoñuñ var ne ṣag u ne şimâl olmaz

Ṣanî‘u’llâh-ı a‘lemsin rahîmu’llâh-ı erhamsin

Kerîmu’llâh-ı ekremsin kemâlıña miṯâl olmaz

Celâliñ kibriyâsından eger keşf eyleseñ envâr

Kamu ‘âlem ola fânî ki ceng ü cim ü dâl olmaz

Olursa vakt-ı ma‘a’llâh meger ire habîbullah

Pes andan gayrı ‘abdullâh melek cin perr ü bâl olmaz

Kelâmıñdur senüñ yâ Hû ki lâ ilâhe illâ Hû

Okur zâkirleriñ Hû Hû çü senden infisâl olmaz

Buyurduñ çün atî‘u’llâh yaratduñ her şeyi li’llâh

Diyeler tâ ki ẕikru’llâh yeg andan min fi‘âl olmaz

Eger insân eger ḥayvân her eşyâ emriñe fermân

Ki senden gayrıdan ey Cân kamu halka Zevâl olmaz

Delîlim âyet-i Kur’ân ki sübhâne’lleẕî burhân

Ki lâ-ezmân ve lâ-imkân veyâhûd mülk ü mâl olmaz

Münezzehsin tasavvurdan ve fi’l-cümle bilinmekden

Akıllar mât u sergerdân bilinmek ihtimâl olmaz

Celîl ü ẕü’l-celâlsın hem Cemîl ü zü’l-cemâlsın hem

Azîm ü Bî-mitâlsın hem çü zâtıña mitâl olmaz

Seni söyler ḳamu diller uçan ḳuşlar esen yeller

Cemâliñ bâgına güller müzeyyen ak u al olmaz

Kime kim irdi bir ẕerre dîdârıñ ẕevkıniñ derdi

Dü ‘âlemde aña emṯâl nebât u kand u bal olmaz

Kanı şol derd-ile yanan kim oldur ‘aşkıla kanan

Visâliñ gibi ey Cânân ki bir dahı viṣâl olmaz

Kime kim ‘aşḳıñ odından ḳıġılcım irdi bir ẕerre

Ne meyl-i bâḳî ne fânî ne ġuṣṣa ḥırḳa şâl olmaz

Ḫayâliñ derdiniñ ẕevḳın kime keşf eyleseñ bir kez

Ki devlet ṭâli‘i böyle mübârek ḳutlu fâl olmaz

Açıla vahdetî güller şaḳıya mürġ u bülbüller

Niçe şerh eyleye diller kim anda ḳîl u ḳâl olmaz

Şu kim ‘aşkıñ ile ḥayrân bulupdur kâmil-i imân

Yoluñda kim ki virdi cân aña ḥadd ü su’âl olmaz

Şu kim ẕikriñi derd-ile getürdi ‘aşḳ-ıla dile

Aña şeyṭân ne kâr ḳıla pes aña mekr ü âl olmaz

Bilürsin kim ḫaṭâmuz çoḳ ‘inâyet eylegil ey Ḥak

Çü sensin Fâ‘il-i muṭlaḳ ki hergiz ġayrı ḥâl olmaz

Cân alup cân viren sensin getürüp gideren sensin

Bu devrânı süren sensin saña baḥṯ-i cidâl olmaz

Çü sensin Hâdî-i burhân kerem ḳıl luṭfıla iḥsân

Ki senden ġayrı yâ Deyyân ve lâ-mennü ẕü’l-mâl olmaz

Egerçi ḳaradur yüzüm velâkin ṭogrıdur özüm

Saña yalvarmaġa bir dem ḳanı ṭâḳat mecâl olmaz

Eger fazl-ı ‘inâyâtıñ olursa derdime dermân

Ne ġam ġuṣṣa baña ġayrı işimde hiç melâl olmaz

Ḫudâvendâ Ḫudâvendâ hemân fażlıñ ola cânda

Kim zîrâ Ümmî Sinânda havâss-ı hâssı hâl olmaz