Sîne-i tengde bend et hele evvel nefesin

Sonra gör himmet-i vâlâsını feryâd-resin

Murg-ı âvâreyi âmâde-i pervâz edegör

Dest-i eyyâm şikest etmeden evvel kafesin

Mekteb-i sînede bir tıfl-ı havâyîdir dil

Kim henüz anlamamış farkını aşk u hevesin

Bunca demdir ki gülün eyledi bülbülden dûr

Dâd elinden bu şikest olası künc-i kafesin

Himmet ey kâfile-sâlâr-ı tarîkat tâ çend

Dûrdan gûşumu pür-şûr ede bang-ı ceresin

Beni tâ şöyle harâb eyle ki sâki dilde

Neş'e-i mey sayam endûhunu bîm-i asesin

Sıdka sarf edegör enfâsını çün subh Nedîm

Matlaʿ-ı mihr ola tâ kim nefes-i bâz-pesin

Son Yazılar