Sâkiyâ hûşum alan zemzeme-i çeng midir

Yohsa destindeki peymâne-i gül-reng midir

Nağmene tîr-i nigeh pîş-rev olmakda meger

Mutrıb ebrû da kemânınla hem-âheng midir

Laʿl-i handân mı yahud kûçe-i verd-i terde

Dest-i târâc-ı sabâdan çözülen deng midir

Perde-i şermi giderdin ruh-ı pür-tâbından

Kasd o gül-çehreye ey duht-ı ineb reng midir

Bir nihânîce tebessüm de mi sığmaz cânâ

Söyle billah dehenin tâ o kadar teng midir

Lezzetinden nice âb olmadın ol laʿl-i terin

Meded ey sâgar-ı yâkût dilin seng midir

Ne bu nev-nakş-ı tırâzende Nedîmâ yohsa

Üstâd-ı kalemin hâme-i Erjeng midir

Nedîm

Son Yazılar