Salınan kûyında ol serv-i semen-sîmâ mıdur

Salınan kûyında ol serv-i semen-sîmâ mıdur

Gülşen-i cennetde şâh-ı Sidre vü Tûbâ mıdur

Zahm-ı sînem içre cânâ kanlu peygânuñ senüñ

Goncada pinhân olan berg-i gül-i ra’nâ mıdur

Mürde-i derd ü gama cânlar bagışlar cür’ası

Sâkıyâ bi’llâh mey-i hamrâ dem-i Îsâ mıdur

Agzuñ içre diş midür ya gonca içre jâle mi

Kevkeb-i dürrî midür ya lü’lû-yı lâlâ mıdur

Bâkî-i dil-hasteye cevr-i firâvân itmeden

Kasduñ öldürmek mi yogsa nâz u istignâ mıdur