Salâdur ehl-i dermâna bugün derd isteyen gelsün

Ṣalâdur ehl-i dermâna bugün derd isteyen gelsün

Cemâli bâġına yâriñ girüp verd isteyen gelsün

Dîẕârı zevḳı derdinden başım ṭop oldı cân çevgân

Girüp meydânına ‘aşḳıñ bugün merd isteyen gelsün

Şular kim ‘ârif-i bi’llâh ḳomazlar dilde ġayru’llâh

Fenâ-ender-fenâdan ṣoñ beḳâ yurd isteyen gelsün

İrelden fażl-ı Yezdânî dilâver eyledüm cânı

Yañıldup ‘aşḳ-ıla nefsi işin nerd isteyen gelsün

Ḳanı ‘âlemde bir dânâ ola kim şöyle merdâne

Virüp ‘aḳlı virüp cânı hemân ferd isteyen gelsün

Düzeldi ‘aşḳ u bünyâdı atarlar ṭopı ḳudretden

Geçüp benlik sarâyından yıḳup ḫurd isteyen gelsün

Bugün ḥikmetde Loḳmânam ḳılam dil-dâr içün dil pâk

Naẓar-gâh olmaġa ḳalbi aña vird isteyen gelsün

Ben ol Burhân-ı a‘lâdan oḳıdum ḥikmetin sırrıñ

İlâhî ṣan‘ata irmiş ki şâkird isteyen gelsün

İki ‘âlem hevâsından selâmetdür Sinân Ümmî

Bugün ‘aşḳıñ seḥer bâdı eser berd isteyen gelsün