Rûyun bezmde perde-keş-i haclet olmasın

Lutf eyle mihre zerre kadar minnet olmasın

Göstermez oldu laʿlini ol hatt-ı nev sakın

Tahrîm-i hamra nâzil olan âyet olmasın

Ben kûh kûh derd olayım iştiyâk ile

Bâr-ı nigâh o şûha hemân sıklet olmasın

Hûn-ı cigerle besleyeyim tek o gamzeler

Tâ böyle ser-girân-ı mey-i nahvet olmasın

Zahm urma bûy-ı gül dahı olursa âşıkın

Yelmân-ı tîğ-i nâza meded zahmet olmasın

Zinhâr bülbülün dahı tağlît-i hüsn ile

Gülbün tahayyül etdiği ol kâmet olmasın

Gîrâ eden o pençe-i müjgânı hep yine

Dilden rübûde eylediği tâkat olmasın

Geh bana nâz u gehi verir ruhsat-ı niyâz

Nâz eylemek niyâza da bir âdet olmasın

Aldı bu nazm-ı nev selefin nâmın ey Nedîm

Âsâyişinde ol sana hem külfet olmasın

Son Yazılar