Riyâsı zâhidin der-kârdır dil-ber husûsunda

Velîkin zâlimin ârâmı kalmaz zer husûsunda

Bugün cânâ mevâʿîdin hesâb ettikde uşşâka

Yine vâfir nizâʿ oldu bizim defter husûsunda

Kuşağın tügmesin çözmekde havfım yokdur ammâ kim

Yürek titrer kemer-bendindeki hançer husûsunda

Varırsan hâne-i hammâra sâkî lutf et unutma

Dil-i zârın recâ-mend olduğu sâgar husûsunda

Ne zîbâ ülfet etmiş duhter-i rez beççe-i muğla

Muvaffak pîr-i mey hakkâ püser duhter husûsunda

Ne denlü germ ise bâzârın âhır hâk-ber-sersin

Bunu ey hâce gör âteşle hâkister husûsunda

Dirîgâ olmadık bir dil-güşâ maʿşûkâ dil-dâde

Hele âyînemiz bî-baht rûşenger husûsunda

Nedîmâ sîne vü bâzûnu nerm et yâr geldikçe

Müsâfir râhat ister bâliş ü bister husûsunda

Son Yazılar