Pîrüm ‘azîzüm bâ-safâ seyrâna gelmişem saña

Pîrüm ‘azîzüm bâ-ṣafâ seyrâna gelmişem saña

Maẓhar-ı ẕât-ı Muṣṭafâ sulṭâna gelmişem saña

Ey küntü kenziñ maẓharı ṭâlib-i ḥaḳḳıñ rehberi

Ey mürşidleriñ serveri iḥsâna gelmişem saña

Ey kân-ı ‘ilm ü ‘irfânım maẓhar-ı sırr-ı Sübḥânım

İderiseñ ḳabûl cânım ḳurbâna gelmişem saña

el-Mü’minûne lâ-yemût ḥayy ü beḳâsın bî-vücûd

Sundum saña elimi ṭut Loḳmâna gelmişem saña

Ẓâhir tenim bâṭın cânım döndüm saña küllî yönüm

Ḳalmadı ẓann u gümânım imâna gelmişem saña

Yandı ciger oldı kebâb dilerem ola fetḥ-i bâb

Nûş itmege âb-ı ḥayât mestâne gelmişem saña

Yüzler sürüben aġlayu himmetiñe bel baġlayu

Ḳatre oluban çaġlayu ‘ummâna gelmişem saña

İrgirmege maḥbûbına ṭâlibleri maṭlûbına

Emrâż-ı ḳalbiñ bâbına dermâna gelmişem saña

Girdüm bu ‘aşḳ bâzârına ḳomaz bu günüm yarına

Yanmaġa derdiñ nârına pervâne gelmişem saña

Ol küntü kenzi bulmaġa sırrıña ‘ârif olmaġa

İlm-i ledünnî bilmege ‘irfâna gelmişem saña

Ben bilmezem aḥvâlimi bulmaġa ṭoġrı yolımı

Bî-çâreyem ṭut elimi dîvâne gelmişem saña

Bulmaġa vaṣl-ı yârimi ḳodum nâmûs u ârımı

İrgirmege ḳaṭârımı kârbâna gelmişem saña

Ümmî Sinân eydür pîrim artdı benüm âh u zârım

Envârı gözler gözlerim sübḥâna gelmişem saña