Pâdişâhım sen bizi var eyledüñ hikmet budur

Pâdişâhım sen bizi var eyledüñ ḥikmet budur

Ḳudretiñle kendüñe yâr eyledüñ raḥmet budur

Dilime nuṭḳ eyledüñ söyler ki Allâh ismiñi

Şey’ idindüñ Rabbim olduñ şânıña minnet budur

Bî-nihâyet luṭfuñ oldur keşf-i Ḳur’ân eyledüñ

Muṣṭafâ devrinde geldüm ‘âleme ḥurmet budur

İlm ü ‘irfânıñ güliyle cân dimâġın ṭoyladuñ

Enbiyâlar evliyâlar irdügi leẕẕet budur

Kâ’inâta gelmişem bir gelmeyeydüm bir daḫı

Ḥamdü li’llâh ẕâtıñı ẕikr eylerem fırṣat budur

Arş u kürsî kâ’inâta ṣıġmadum didüñ ‘ayân

Mü’miniñ ḳalbinde pinhân olduġuñ ‘izzet budur

On sekiz biñ ‘âlemiñ sen Ḫâliḳısın bî-gümân

Ṣûretim insân yaratduñ cümleden nuṣret budur

Bî-niyâz oldum caḥîmiñden na‘îmiñden bugün

Her neye emr eyleseñ cân üstine niyyet budur

Kim tecellî kim tesellî çoḳ temennâ ḳıldılar

Çün bize derdiñ müyesser eyledüñ ṣoḥbet budur

Gerçi ‘âşıḳ ḥayretiñ şem‘indeki pervânedür

Ayn ü şîn ü ḳâf içinde ‘ârife ḳurbet budur

Mürşid-i kâmil yüzinden vechiñe ḳıldum naẓar

Kisvet-i ‘izzet dinilen başıma devlet budur

Ey Ta‘âlâ ḳanḳı fażlıñ vaṣfını şerḥ eyleyem

Aşḳ derdiñ cur‘asın nûş eyledüm mürvet budur

Vuṣlatıñ peymânesinden nûş idelden cânumuz

Şâhidem ḳıldum şehâdet ṭâlibe vaḥdet budur

Görmüşem Ḳur’ân içinde muştuladuñ sen beni

Ẕikr iderseñ mürvetiñden adımı raġbet budur

Geldüginden aṣṣı ḳıldı ‘âleme Ümmî Sinân

Gerçi mücrim ismi ile añılan ümmet budur