Olsa da hâmûş laʿl-i işve-perdâzın senin

Lâl eder Hârûtu çeşmân-ı sühan-sâzın senin

Mısraʿ-ı mevzundur ammâ nâ-resâdır serv-i bâğ

Eyleye tazmin meger kadd-i ser-efrâzın senin

Âşıka kasdın nümâyân olmamak mümkin midir

Ol nigâh-ı sad-zebândır çünki gammâzın senin

Bir nigâh-ı âşinâ besdir bize muğ-beççeden

Baʿd-ezin ey duhter-i rez çekmeziz nâzın senin

Bahtı bîdâr etmek âsândır hemân olsun bülend

Ey harûs-ı nâle-i şeb-gîr âvâzın senin

Gûşe-i ebrû-yı dil-berden yaman oldu Nedîm

Şîve-i dil-dûz-ı nevk-i kilk-i tannâzın senin

Son Yazılar