Nûş idelden câm-ı ‘aşkı cânımuz mestânedür

Nûş idelden câm-ı ‘aşḳı cânımuz mestânedür

İrdügi esrârı sırrıñ ‘âlemi raḥmânedür

Ol şarâbı kim bugün ‘aşḳıñ elinden içdi cân

Tâ ezel bezm-i elestiñ ḳurduġı meyḫânedür

İrişüp cân bülbüliniñ mest ü ḥayrân olduġı

Âlem-i aṣliyyeden ol gördügi reyḥânedür

Ḥamdü li’llâh Ḥaḳ bugün ḥaḳḳa’l-yaḳîndan açdı râz

Gördügi cânıñ ezelden baḳduġı seyrânedür

Ol ḥaḳîḳat şehrine sulṭân olan cânâneye

Bu vücûdum ḳafesi ancaḳ misâfirḫânedür

İrmeyen bilmez benüm ‘aşḳ-ıla ġavvâṣ olduġum

Tevḥîd-i ẕât-ı İlâhî dinilen ‘ummânedür

Zühd ü taḳvâ menzilinden geçdi cân eyler vedâ

Varduġı dâr [ol] ene’l-ḥaḳ söyleyen meydânedür

Bu fenâ mülkünde ‘aşḳa cân virüp baş oynadan

Âşıḳıñ aḥvâli sırrın kim bilür merdânedür

İsm-i a‘ẓam ‘aşḳına ẕikrinde vuṣlat bulduġum

Ḥayy ü Bâḳî ẕât-ı a‘lâ pâk olan sübḥânedür

Aşḳ alup benden beni ẕâtında ḳurbân itdügi

İki ‘âlem emrine fermân olan sulṭânedür

İḫtiyârımla degüldür bu diliñ şerḥ itdügi

Nuṭḳ-ı Raḥmândur cesed aña bugün berḫânedür

Bu ḫarâb olmış göñül cân u cihân terk eyleyüp

Ol ḥaḳîḳat şem‘ine par par yanan pervânedür

Vaḥdetiñ envârına ġarḳ olduġından ‘aşḳ-ıla

Daḫı ‘aḳla gelmedi Ümmî Sinân divânedür