Nevâ-yı dil hevâ-yı vasl-ı yâr-i dil-sitân üzre

Nevâ-yı dil hevâ-yı vasl-ı yâr-i dil-sitân üzre

Sadâ-yı savt-ı bülbül nakş-ı bâg u bûstân üzre

Harîm-i gülsitân reşk-i Nigâristân-ı Çîn oldı

Zemîn nakşın gören tercîh ider şimdi zamân üzre

Basît-i hâke bir garrâ bisât-ı nev salup âzer

Girihler bagladı bâd-ı sabâ âb-ı revân üzre

Gül ü gonca yine rumî hatâyı resm idüp sûsen

Ser-â-pâ çekdi hançer berg-i levh-i gülsitân üzre

Murassa’ sâyebânından dökildi ebr-i nîsânuñ

Dür ü yâkût-ı rummânî nihâl-i ergavân üzre

Ser-âgâz itdi nev-rûz-ı ‘ Acemden bülbül-i şeydâ

Kılup bir savt peydâ feth-i Âzerbâycân üzre

Göñül bâg-ı cihândan ârzû-yı berg-i ‘ ayş eyler

Felek mahz-ı hayât-ı bî-sebâta imtinân üzre

Du’ â-yı devlet-i sultân-ı ‘ âdil bizden ey Bâkî

Himâyet ol nigehdâr-ı zemîn ü âsmân üzre

Bahâr oldı yine yüzler süre geldi gül ü lâle

Gubâr-ı âsitân-ı husrev-i kişver-sitân üzre