Müşkilim var size ey Hak dostları eylen reşâd

Müşkilim var size ey Hak dostları eylen reşâd

Kim cevâbın veren olsun Hak katında ber-murâd

Ol ne kesretdir ki anın haddi yok pâyânı yok

Kesret içinde ne vahdetdir ki ona yok idâd

Çokdur envâ'ı bu halkın biri insân üç böllük

Biri ehl-i hayme birisi kurâ biri bilâd

Üç bölükden üç bölük dahi olunmuş ey hocâ

Biri kâfir biri mü'min biri ehl-i inkıyâd

Hangisi Hak'dan ırak olmuş bunların söylegil

Hangisi kâdir ki Hak emrine eyleye inâd

Dünya vü ukbâ dahi hem haşr ü neşr olmak nedir

Bunları bildir bana hem ne durur mebde' me'âd

Dünya vü ukbâ dahi hem haşr u neşr olmak nedir

Bunları bildir bana hem ne durur mebde' me'âd

Âhiretde cennet ü nirân u berzah kim denir

Bunların aslı nedendir olısar yevme't-tenâd

Kahr u lutfun illeti bir demenin aslı nedir

Bu ikinin vahdeti midir aceb râh-ı sedâd

Yani râhat ayn-ı mihnet mihneti râhat mıdır

Cümleden râzı mıdır Hak ber-tarîk-ı ıttırâd

Hak Te'âlâ'dan yakın insâna bir şey yok durur

Lîk bildir kim durur Allah veyâ kimdir ibâd

''Men aref''le ''mâ rameyte iz rameyte'' remzini

Fark edegör mümkin ise ber-sebîl-i infirâd

Müşkili çokdur Niyâzî'nin veli biri de bu

Zâhid Hakk'ı anlasa zühdü neden olur kesâd