Münezzeh zâtı bahrından nedür mevcin kılan peydâ

Münezzeh ẕâtı baḥrından nedür mevcin ḳılan peydâ

Ya ol deryâ-yı muṭlaḳdan nedür evvel olan peydâ

Ki ẕâtı lâ-teayyünden ḫaber ṣormaḳ degül ma‘nâ

Anuñ âṯâr-ı feyżinden ḫaber virsün bilen peydâ

Çün ol ‘ummân-ı a‘ẓamdan ḳılupdur nûrı ol câmi‘

Ḫaberdâr ol kim ol nûrdan ne cevherdür olan peydâ

Budur ol yüce nûr-ı ẕât ḳılan cümle ṣıfâtı mât

Ne ḫâliḳ oldı ne maḫlûḳ nedür bundan gelen peydâ

Nedür ol ẕât-ı a‘lâdan rıżâ ṭaleb ḳılan evvel

Aña ḥükm eyleyen sırran rıżâ emrin ḳılan peydâ

Ki ya‘nî isteye irżâ bilinmeklük-durur a‘lâ

Ki oldur aḥsen ü ekber iden ‘irfân ḳılan peydâ

Amânıñ ‘ilmini evvel ne sırdur eyleyen iḥyâ

Ne keyfiyyet kemâlidür kim anda cem‘ olan peydâ

Ṣıfâtı baḥṯiniñ evvel ḳadîmî dinilen oldur

Ḥaḳâyıḳ andan olmuşdur ne kim geldi gelen peydâ

Gelüp ‘irfân diler insân ola ẓâhir nihân iḥsân

Ki ol nûruñ żıyâsından ḥaḳâyıḳlar ḳılan peydâ

Nedür ol nûr-ı ḳand-ile gelen ol nûr-ı câmi‘den

Ki illâ hû kelâmıyla ezel maḫlûḳ olan peydâ

Sinân Ümmî ḥaḳâyıḳda kim anuñ pertevindendür

Pes ol burhân-ı a‘lâdur anı herdem ḳılan peydâ