Mevlâm ‘aşkıñ bize a‘zam îmâmdur

Mevlâm ‘aşḳıñ bize a‘ẓam îmâmdur

Uyaldan ṭâ‘atum küllî tamâmdur

Bu ‘aşḳa virmişem ben iḫtiyârım

Ne kim ḳılsa baña faḫr u ġınâmdur

Baña ‘aşḳ olmayıncaḳ dü cihânda

Eger ẕevḳ u eger ‘işret belâmdur

Baña kim ‘aşḳa tevbe ḳıl dir ise

Benüm bu ‘aşḳ atam-ıla anamdur

Eger biñ pâre ḳılsalar tenimi

Ben ‘aşḳa lâ dimezem baḫt-ı nâmdur

Bu ‘aşḳıñ vaṣfını bizden ṣoranlar

Biliñ kim tâ ezelden âşinâmdur

Eger benden kim isterse naṣîḥat

Ḳomasun ‘aşḳı bu ‘âlî-maḳâmdur

Maḥabbet nârına bu dil yanaldan

Benüm âh-ıla zârum ṣubḥ u şâmdur

Baña vir derdi dermân al diyenler

Benüm derdim devâ-yı ve’s-selâmdur

Anuñ ẕikri beni külḫân idelden

Yunur ‘âşıḳlara cânım ḥammâmdur

Ḫudânıñ fikridür cânım çerâġı

Daḫı derdi baña dermân-ı tâmdur

Baña bu ‘aşḳa kim oldı ḳulaġuz

Anı Allâh sevindürsün du‘âmdur

Sinân Ümmî bu ‘aşḳa yâr olaldan

Yoġ oldı varlıġı bir ḳurı nâmdur