Men Hudânıñ tevhîdi bâġında devlet ehliyem

Men Ḫudânıñ tevhîdi bâġında devlet ehliyem

Ḥamdü li’llâh çoḳ şükür ẕâtında vaḥdet ehliyem

Bâreka’llâh ḫôş tecellî eyledi ol Pâdişâh

Muṣṭafânıñ vechiniñ şevḳından ‘işret ehliyem

Ḫôş ṣafâdur ṣan‘atım Allâhu a‘lem kim bugün

Ḥaḳ Ta‘âlâ ‘aşḳınıñ bâġında ḫalvet ehliyem

Ḳısmet evvel ol naṣîbin almayandan gizlüdür

Âteş-i ‘aşḳ-ıla pişmiş yaḫşı ni‘met ehliyem

Mürşid-i kâmil çerâġından münevverdür cihân

Pir ‘azîzim himmetinden nûr-ı ‘izzet ehliyem

Tevḥîdiñ deryâsına baḥrî olan gelsün berü

Ol Raḥîmiñ raḥmeti nehrinde mürvet ehliyem

Ṣundı Loḳmân ḳalb-i emrâżıñ devâsın yâ Ġanî

Derdlü cânlara ṣalâdur ‘ilm-i ḥikmet ehliyem

Îd-i vaṣla irmeg-içün çillegâhım erbe‘în

Îd-i ekber ḥacc-ı ekber oldı nuṣret ehliyem

Âşıḳ oldur ma‘şûḳuñ şevḳında ser-gerdân ola

Aşḳ-ıla buldum vefâlar özge ṣoḥbet ehliyem

Gün gibi dîẕârı şevḳından müşerref oldı cân

Ḳalmadı ẓulmet siyâhı Ḥaḳka vuṣlat ehliyem

Şöhret ü nâm ṣâḥibidür añlamañ Ümmî Sinân

Dem-be-dem dôst eşiginde nâsdan ‘uzlet ehliyem