Lâyık mı güller açıla feyz-i bahâr ile

Bülbül kafesde zâr u tenük hâr hâr ile

Âdem bu kaht-ı sâl-i maʿârifde reşk eder

Tahsîl-i nan-bahâ edene kisb ü kâr ile

Emdir leb-i hat-âverin ey sâki sun şarâb

Ol câm-ı laʿl-fâm-ı zümürrüd-nigâr ile

Kâr etdi nakşı ol bütün evvel derûna lîk

Âhir karârım aldı benim bir karâr ile

Mest olmadıkça çeşmi bulunmaz nizâm-ı hüsn

Bezmin gider tarâveti bir tevbekâr ile

Bir gün nesîm-i feyz bulup gülşen-i emel

Gül-gonca-i murâd açılır rûzgâr ile

Âyîneye yüz aklığı sîm-âbdır ey Nedîm

Sâf oldu sînemizde dil-i bî-karâr ile

Şermende eyledin bizi ey tabʿ-ı bü'l-füzûl

Tanzîr-i nazm-ı hazret-i fahr-i kibâr ile

Nıhrîr-i asr Ârif Efendi ki fahr eder

Râzî der-i fezâ'iline iftikâr ile

Kindî ederdi kendi zebânın bürîde ger

Kilkin göreydi nazm-ı belâğat-şiʿâr ile

Son Yazılar