Kevn ü mekândan geçeniñ

Kevn ü mekândan geçeniñ

Menzili ‘arşu’llâh olur

Yoḳluḳ meyinden içeniñ

Varlıġı kenzu’llâh olur

Her kim ki ister yârını

Bıraḳsın elden varını

Gören dostuñ diẕârını

Bugün fenâ-fi’llâh olur

İren faḳrıñ tamâmına

Ḳanar vuṣlatıñ câmına

Fenâ-fi’llâh maḳâmına

Ulaşan maḥvu’llâh olur

Her kim ki terk-i cân olur

Bir cânına biñ cân olur

Nefsini fehm eyler bilür

Hem ‘ârif-i bi’llâh olur

Berzaḫ iliniñ âfeti

Pür-nûr olur şeḳâveti

Âşıḳlarñ ziyâreti

Oldur ki beytu’llâh olur

Bulan bu ‘aşḳıñ dadını

Keşf eyler ‘ilm-i bâṭını

Muḳarreb eyler adını

Ḥâl-ile ehlu’llâh olur

Maḳṣûdımuz öñden ṣoña

Budur ki dirüm ben saña

Sırdur seni viren aña

Tevḥîd-i ẕâtu’llâh olur

İlm ü ‘irfân olur sözi

Sırr-ı Furḳân olur özi

Her ḳande kim baḳar gözi

Ayn-i ḳudretu’llâh olur

Bilmez olur ṣolın ṣaġın

Seyrân ider dôstuñ bâġın

Anca ṭuyar cân ḳulaġın

Ḫıṭâb-ı sırru’llâh olur

Bî-nişândur soyladıġı

Lâ-mekândur yayladıġı

Dâ’im dilde söyledigi

Ol küntü kenzu’llâh olur

Ḳanda kim var Ḥaḳ meydânı

Almayalar degme cânı

Zirâ ki her cân mülküni

Ṣanma ki ‘aşḳu’llâh olur

Şol cân ki ‘aşḳıñ yiridür

Kâmil gerekdür arıdur

Kâmil ki şol ‘aşḳ eridür

Dâ’im işi Allâh olur

Ümmî Sinânıñ irdügi

Cânını ḳurbân virdügi

Dâ’imâ anuñ gördügi

Cemâl-ı ẕâtu’llâh olur