Kaçan kim nâz ile reftâr iderler servkâmetler

Kaçan kim nâz ile reftâr iderler serv-kâmetler

Kopar âşıklaruñ başına ol demde kıyâmetler

Benüm bilmezdi kimse ‘ âşık-ı şeydâlıgum hergiz

Tenümde tâze tâze yakmasam dâg-ı mahabbetler

Koyup nâmûs ile ârı düşüp kûy-ı harâbâta

Yürür çâk-i girîbân olup erbâb-ı melâmetler

Olur mıydum gehî giryân gehî sûzân gehî nâlân

Felek âyînesi göstermeyeydi dürlü sûretler

Birine beñzemez ben sevdügüm dil-dâr hüsn ile

Cihân içinde çokdur Bâkıyâ gerçi ki âfetler