Her yeri hüsnün gülistân eylemiş

Her yeri hüsnün gülistân eylemiş

Her tarafda bâğ u bostân eylemiş

Zînet etmiş zîr ü pes evsâf ile

Her sıfâtdan zâtın ilân eylemiş

Bunca evsâfdan görünen bir cemâl

Bir cemâli bunca elvân eylemiş

Hep kitâb-ı Hak'dır eşyâ sandığın

Ol okur kim seyr-i evtân eylemiş

Hüsnünü izhâr eder bunca sıfât

Zâtına insânı bürhân eylemiş

Hakk'ı istersen yürü insâna bak

Şems-i zât yüzünde rahşân eylemiş

Hak yüzü insân yüzünden görünür

Zât-ı Rahmân şeklin insân eylemiş

Nice görsün şems-i vechin çün anın

Zâhid-i a'mâ ki tuğyân eylemiş

İçini almış anın zerk u riyâ

Gönlünü şeytân perîşân eylemiş

Her nazarda gördüğü Hak ârifin

Her görüşde nice ihsân eylemiş

Hakk'ı anlamak değil âsân ola

Âdetâ Hak böyle erkân eylemiş

Sâlik erince kemâle şöyle bil

Yüreğin baş bağrını kan eylemiş

Anlayınca zât-ı Hakk'ı zevk ile

Bu Niyâzî nice seyrân eylemiş