Her neye baksa gözün bil sırr-ı Sübhân andadır

Her ne işitse kulağın mağz-ı Kur'ân andadır

Her şey'e mahlûk gözüyle baksan ol mahlûk olur

Hak gözüyle bak ki bî-şek nûr-i Yezdân andadır

Kesret-i emvâca bakma cümle bir deryâ durur

Her ne mevci kim görürsün bahr-i ummân andadır

Vahdeti kesretde bulmak kesreti vahdetde hem

Bir ilimdir ol ki cümle ilm ü irfân andadır

İbret ile şeş cihetden görünen eşyâya bak

Cümle bir âyinedir kim vech-i Rahmân andadır

Söyleyen ol söylenen ol gören ol görünen ol

Her ne var a'lâ vü esfel bil ki cânân andadır

Mazhâr-ı tâmmı velî âdem yüzüdür şübhesiz

Künh-i zâtı hem sıfâtı cümle yeksân andadır

Haşr u neşr ile sırât u dûzah u mâlik azâb

Hem dahil rıdvân u cennet hûr u gılmân andadır

Görünen sanma Niyâzî'nin hemân sen mülkünü

Gönlü bir virânedir kim genc-i pinhân andadır

Son Yazılar