Her cefâ kim eyledüñ geldi vefâlar bilmiş ol

Rûha râhatdur gamuñ câna safâlar bilmiş ol

Gerçi ser-gerdân idüp salduñ belâ gird-âbına

Yüz çevürmezler kadîmî âşinâlar bilmiş ol

Yanuña kalur ne kılsañ pâdişehsin dûstum

Şânuna lâyık degül ammâ cefâlar bilmiş ol

Cûy-ı eşküm şöyle tugyân itdi kim bir gün hemân

Âsmânuñ âsiyâ-sengin yuvalar bilmiş ol

Rişte-i cânumda zülfüñ bir girih bend itdi kim

Halline kâdir degül müşkil-güşâlar bilmiş ol

Çok tolaşdı turra-i müşgînüñe âşüfte-dil

Çîn-i zülfüñ bend ider bir gün hatâlar bilmiş ol

Pister-i hicrânda dâ’im zâr u bîmâr olmada

Ölmege canlar virürler mübtelâlar bilmiş ol

İltifâtuñ Bâkiyi dünyâya mahsûd eyledi

Hep senüñdür çekdügi derd ü belâlar bilmiş ol

Son Yazılar