Hemîşe merdüm-i çeşmüm izâr-ı yâra bakar

Hemîşe merdüm-i çeşmüm izâr-ı yâra bakar

Gözüm o penceredür sahn-ı lâlezâra bakar

Zamân gelür yine zerrîn kadeh alur eline

Çemende nergis-i şehlâ hemân bahâra bakar

Nesîm-i lutfunadur intizârı fülk-i dilün

Çog oldı sâhil-i mihnetde rûzgâra bakar

Seni gelür işidüp bâga yâsemen cânâ

Çıkup o şevk ile dîvâre reh-güzâra bakar

Ne i`tibâr bu evzâ`a merd olan Yahyâ

Ne zillete nazar eyler ne i`tibâra bakar