Hecr-i la’lüñle dem-â-dem göz yaşı mey-gûn olur

Hecr-i la’ lüñle dem-â-dem göz yaşı mey-gûn olur

Dîde dilden dil hadeng-i gussadan pür-hûn olur

Ol melâhat Mısrınuñ Yûsuf-cemâli şevkıne

Seyl-i eşküm Nîlveş günden güne efzûn olur

Âb-ı çeşmüm bahr ider hâmûnı tugyân eylese

Sarsar-ı âhum tokınsa taglar hâmûn olur

Pûte-i hicrân içinde sîm-tenler ‘ aşkına

Gerçi yanur yakılur ‘ âşık velî altun olur

Ehl-i ‘ aşkuñ nâlesin ney kâmetin çeng eyledüñ

Pâdişehsin itdügüñ şimden girü kânûn olur

Gâh gâhî gûşe-i çeşmüñle kılmazsañ nigâh

Bâkî-i bî-çârenüñ ahvâli dîger-gûn olur