Hayretde koydu hâtır-ı uşşâkı zülf ü hat

Hayretde koydu hâtır-ı uşşâkı zülf ü hat

Gösterdi kâr-ı ef ʿi-i tiryâkı zülf ü hat

Bir bâğdır cemâli ki gül-berk-i rûy-ı âl

Şeb-bûyu hâl sünbül ü leylâkı zülf ü hat

Muʿciz ki mihr hem şeb-i yeldâ vü hem bahâr

Cemʿ oldu tutup ol ruh-ı berrâkı zülf ü hat

Cân riştesi biri birisi mâh hâlesi

Tutdu netîce enfüs ü âfâkı zülf ü hat

Cedvel-keşîde kıtʿa-i yâkuta döndürür

Aks eyledikçe câmda ey sâki zülf ü hat

Gel cüft ü tâk oynayalım bezm-i vaslda

Olsun velîk cüfti ile tâkı zülf ü hat

Takup kemend boynuna döndürdü Kaʿbeden

Çekdi çevirdi zâhid-i zerrâkı zülf ü hat

Çokdan giderdi Çîne yahud Zengibâra dek

Zabt etmeseydi hâtır-ı müştâkı zülf ü hat

Birisi şerh yazdı biri etdi tahşiye

Alup miyâna hikmetü'l-işrâkı zülf ü hat

Varmaz dil ehli zâbite kâziye onların

Zencîr-i habsi hüccet-i ıtlâkı zülf ü hat

Bir nısf dâireyle iki hatt ile tamâm

Gösterdi kâr-ı cümle-i evfâkı zülf ü hat

Hem-çün makas dehânını hamyâzegâh edip

Çâk etdi şâne-veş dil-i hallâkı zülf ü hat

Vasfet hudâyegânı Nedîmâ yeter yeter

Kıldı siyâh çehre-i evrâkı zülf ü hat

Ebrû-yı yârı şimdilik onun rikâbına

Teşbîh kıl da sonra yine bâki zülf ü hat

Gûş eyledikde nâmının İbrâhim olduğun

Pûşîde kıldı Kaʿbe-i uşşâkı zülf ü hat

Âgûş-ı pençede hat-ı fermânın andırup

Leb-rîz-i hayret eyledi ahdâkı zülf ü hat

Esbindeki kutâs ile kalkan gubârının

Ancak olur nümûne vü mısdâkı zülf ü hat

Eyyâm-ı satvetinde gönül çalmasın deyü

Güm kıldı ben dedikleri allâkı zülf ü hat

Dün tûğı perçemin alemi mushafın görüp

Berkitdi cân-feşanlığa mîsâkı zülf ü hat

Baksak ki şemʿ-i bezmine benzer mi rûy-ı yâr

Etse güşâde perde-i ığlâkı zülf ü hat

Tutsun cihânı haşmeti tâ hüsn ile tuta

Mülk-i Hıtâyı kişver-i Kıpçak'ı zülf ü hat

Nedîm