Haber soran baña dôstdan anı bî-‘akl u cân buldum

Ḫaber ṣoran baña dôstdan anı bî-‘aḳl u cân buldum

Terk eyledüm ‘aḳl u cânı sır içinde ‘ayân buldum

Cûş itdi deryâ-yı vaḥdet ḳamu varlıḳ fenâ buldı

Eṯer ḳalmadı hîç benden cihet yoḳ lâ-mekân buldum

Yitirdüm benligi anda gören görünen ol oldı

Şu deñlü ṭoymışam sırdan direm kim bî-nişân buldum

Bugün vicdânımıñ ẕevḳın eger dirsem beyân olmaz

Düşüp vaḥdet deñizine özüm birlikde kân buldum

Bugün bu dildeki esrâr hemân dôst varlıġındandur

Ḳarâr itmez ḫıṭâb eyler görüñ dôstdan lisân buldum

Tecellîden tesellîden geçen bilür bu esrârı

İrişüp ẕât-ı baḥrında ‘aceb ẕevḳ-ı nihân buldum

Eger naḥvıñ eger ṣarfıñ olup şerḥi dile gelmez

Hüve hüve maḳâmında ne sâ‘at ne zamân buldum

Nihân oldı çün ol vaḥdet ki gördüm ‘âlemi keṯret

Men ol dôstuñ fırâḳından gözüm yaşın revân buldum

İrincek ẕât-ı muṭlaḳda hemân dôst olmış idüm ben

Çü geldüm ‘âlem-i mülke yine Ümmî Sinân buldum