Göñlüme yaġan hemîşe ‘ilm ü ‘irfândur benüm

Göñlüme yaġan hemîşe ‘ilm ü ‘irfândur benüm

Söyledigi bu dilimiñ sırr-ı Ḳur’ândur benüm

Genc ü mâlım baġlamışam ben fenâ urġanına

Ger metâ‘ımdan ṣorarsañ dürr ü mercândur benüm

Cân Yûsufın ṣatmaġa geldüm ki meydân şehrine

Anuñ-içün gevherimiñ ḳıymeti cândur benüm

Virmezem kim ḳadrini bilmez ele bu la‘limi

Râzımı keşf eyledigim ḳâbil-i şândur benüm

Ehl-i ḳâliñ ‘aḳlı irmez kim ne bilsün sürdügüm

Muṣṭafâdan Murtażâdan âyin erkândur benüm

Ḳalb-i emrâżıñ devâsı bâbınıñ miftâḥıyam

Pîr ü üstâdım ṣorarsañ bil ki Loḳmândur benüm

Sâḳıyem meydâna girdim ‘aşḳ elinden ṣunduġum

Ehl-i derd ‘âşıḳlarıñ derdine dermândur benüm

Ayn-ı vuṣlat şerbetidür kim benüm nûş itdigim

Anca ‘âşıḳ ṣoḥbetinde mest ü ḥayrândur benüm

Mevc ṭurmaz ṣad hezârân dürleri ṭaşra atar

Gör vücûdum ḳaṭresini baḥr-ı ‘ummândur benüm

Fâsıḳ u nâdân ne bilsün kim benüm esrârımı

Yoluma bel baġlayanlar bil ki merdândur benüm

Kim ki meydânımda bir cân virdise biñ cân alur

Bir beḳâdur kim fenâsız şâd u ḫandândur benüm

Kârbânım başıdur benüm ‘Aliyyü’l-Murtażâ

Menzilimiñ intihâsı Muṣṭafâ cândur benüm

Re’s-i mâlımdan ṣorarsañ kim belâ-yı derd-i ‘aşḳ

Cânımıñ diñlencesi derd-ile devrândur benüm

Dü cihânıñ naḳşına dil virmeyendür serveli

Şerḥ idüben söyledigim kâmil insândur benüm

Gerçi kim ‘iṣyân-ı ġayba ḳalmışamdur her nefes

İllâ cânım ḫayretinden dôsta ḳurbândur benüm

Âh-ı firḳatdan olupdur dil fenâ-ender-fenâ

Ḫalḳ içinde nâm u ‘ırżım ḫâke yeksândur benüm

Bu Sinân Ümmî ża‘îfiñ yarası yanmaḳ diler

Anuñ-içün kim bu cânım ‘aşḳa mihmândur benüm