Gelüñ görüñ bu ‘âşıklar bu tevhîdiñ hisârına

Gelüñ görüñ bu ‘âşıḳlar bu tevḥîdiñ ḥiṣârına

Ḳonar gâhî ḳona geldi ezelden ḳonucılardur

Gelüñ görün bu ṣâdıḳlar bugün ‘aşḳıñ şarâbına

Ḳanar gâhî ḳana geldi ezelden ḳanıcılardur

Gelüñ ey merd-i ‘âḳıllar naẓar ḳıluñ bu sevdâya

Nice dil virdiler bunlar görüñ Hażret-i Mevlâya

Cenâb-ı ‘İzzete ḳarşu uçup dergâh-ı a‘lâya

Döner gâhî döne geldi ezelden dönücilerdür

Ṣalâdur ehl-i dermâna giden gelsün ṭuraġına

Ḳanı pervâneler yansun bu tevḥîdiñ çerâġına

Ḳarâr itmez bu cân hergiz bine ‘aşḳıñ burâġına

Biner gâhî bine geldi ezelden binicilerdür

Ḳanı bir ‘aḳl-ı evvel kim bu esrârı ḫaber virsün

Ḳanı bir ṭâlib-i esrâr bu ‘ilmi oḳıyup görsün

Budur ‘âşıḳlarıñ kârı ledünnî ‘ilminiñ dersin

Ṭanar gâhi ṭana geldi ezelden ṭanıcılardur

Ḫalâṣ olup geçer ġamdan düşerse bir kişi ‘aşḳa

İçer ol câm-ı vuṣlatdan yâr olursa başı ‘aşḳa

Sinân Ümmî ṣınanmışdur ezelden âteş-i ‘aşḳa

Yanar gâhî yana geldi ezelden yanıcılardur